విద్యా విలువలను చాటిచెప్పేలా యానిమేషన్ రూపకల్పన
- హార్ట్స్ అక్రాస్ ది సీ’ యానిమేటెడ్ లఘుచిత్రం ప్రీమియర్
- ప్రశంసించిన విజయేంద్ర ప్రసాద్
- ఏఐ సాంకేతికతతో సరికొత్త ప్రయోగం
జూబ్లీహిల్స్,నవంబర్15 ( రాజధాని న్యూస్ ) : ప్రేమ, స్నేహం, ధైర్యం, సాహసాల సమాహారంగా రూపొందిన ‘హార్ట్స్ అక్రాస్ ది సీ’ యానిమేటెడ్ లఘుచిత్రం ప్రత్యేక ప్రీమియర్ ప్రదర్శన హైదరాబాద్ జూబ్లీహిల్స్లోని ప్రసాద్ ఫిలిం ల్యాబ్లో నిర్వహించారు. ఈ కార్యక్రమానికి ప్రముఖ సినీ దర్శకుడు, రాజ్యసభ సభ్యుడు విజయేంద్ర ప్రసాద్ ముఖ్య అతిథిగా హాజరై చిత్రాన్ని వీక్షించారు. చిత్ర రూపకల్పన, కథాంశాన్ని ఆయన ప్రశంసించారు. అమెరికాలోని ఒరెగాన్ నుంచి ఇటలీలోని వెరోనా వరకు సాగే భావోద్వేగ ప్రయాణమే ఈ చిత్ర కథాంశం. డా. అపర్ణ వొల్లూరు కథ ఆధారంగా ఆంటోనియో ఆండ్రియాజ్జో దర్శకత్వంలో, ప్రసాద్ గారపాటి నిర్మాణంలో దీనిని రూపొందించారు. మానవ కళాకారుల సృజనాత్మకతకు కృత్రిమ మేధ (ఏఐ) సాంకేతికతను జోడించి పాత్రలు, పరిసరాలు, దృశ్యాలు, కెమెరా కూర్పులను తీర్చిదిద్దారు. ఏఐ ఆధారిత ఇమేజ్ టు వీడియో సాంకేతికతతో యానిమేషన్ రూపొందించడం ప్రత్యేకత. తరగతి గదుల్లో, పుస్తకాల్లో పిల్లలకు బోధించే విలువలను యానిమేషన్ రూపంలో దృశ్యమానం చేయడం ద్వారా విద్యా కథలను మరింత ఆసక్తికరంగా చిన్నారులకు చేరువ చేయవచ్చని వారు అభిప్రాయపడ్డారు. ప్రేమ అనేది కేవలం అనుభూతి చెందే విషయం మాత్రమే కాదని, మన చేతల ద్వారా కూడా దానిని వ్యక్తపరచాలనే సందేశాన్ని ఈ చిత్రం అందిస్తుందని దర్శకుడు ఆంటోనియో ఆండ్రియాజ్జో తెలిపారు. కుటుంబ ప్రేక్షకులు, చిన్నారులను ఆకట్టుకునేలా రూపొందించిన ఈ చిత్రం ప్రేమ, దయ, సహానుభూతి, స్నేహం గొప్పతనాన్ని చాటిచెప్పనుందని నిర్మాత ప్రసాద్ గారపాటి పేర్కొన్నారు.
కామెంట్లు